لينك التسجيل الصوتي علي ساوند كلاود:
https://on.soundcloud.com/zky9fGkhhfR9V3KU3R
واحدة من أصعب الحاجات اللي في رأيي الشخصي اختص بيها ربنا سبحانه وتعالي البشر هي فكرة اتخاذ القرار .. انت بتصحي الصبح بتفتح عينك عشان يبدأ يومك بسلسلة مش بتخلص من القرارات الي محتاجه تتاخد .. تكمل نوم وتاخد اليوم أجازة ولا تروح الشغل .. تاخد شاور ولا تروح بعرقك عشان دي ناس متستاهلش تستحمالهم .. تصلي ولا متصليش .. تعمل دايت ولا تربي كرش .. تشجع الأهلي ولا متشجعوش .. تؤمن بالله أو تكفر .. كلها قرارات محدش حيحاسب علي مشاريبها غيرك وده اللي بيخلي البني أدم خليفة الله في الأرض .. قصة النهاردة حتكون حولين 3 قرارات من 3 بني أدمين مختلفين .. اتنين رؤساء دول والثالث وده المهم اللي فيهم هو عسكري علي الأرض في الجبهة .. ربنا شاء وحطهم في نفس الموقف بس القرار اللي خده كل واحد حيخلينا نقف قدام البني أدمين الثلاثة ونسأل نفسنا هو احنا ممكن نتعلم ايه من الدرس ده؟ بس يمكن أهم حكمة عايزك تطلع بيها من دلوقتي إن أولاً وأخيراً محدش حيشيل الليلة غيرك فلما تاخد قرار خده وانت حاطط ده في دماغك.
القرار الأول .. عايز أعرف دماغ الواد (كيم) فيها إيه؟
كان يا مكان في فترة حكم كيس الشيتوس الحجم العائلي الأولي اللي هي من 2018 لحد 2022 لو تفتكر يعني فجأة كده لقيناه طلع قال علي (كيم يونج أون Kim Jong-Un) زعيم كوريا الشمالية إن الرجل ده جدع وصاحب صاحبه وأنا بحبه وعايز اعمل شغل حلو معاه .. ولو تفتكر الاتنين قعدوا مع بعض فعلاً في جلسة مباحثات اتعملت في سنغافورة سنة 2018 والناس كانت مستنيه إن المباحثات يطلع منها نتايج بس ده محصلش .. لا كوريا الشمالية أعلنت تجميد برنامجها النووي ولا أمريكا قالت إنها حتشيل العقوبات الإقتصادية المفروضة علي كوريا الشمالية .. يمكن بالعكس بعد الجلسة اللي تمت كوريا الشمالية رجعت في كلامها واعلنت إنها حتدوس بنزين في برنامجها النووي اللي وفق التقارير الرسمية الأمريكية فكوريا الشمالية تحت ايدها حالياً 50 رأس نووي قادرين يمحوا من الوجود مدن كاملة في اليابان وكوريا الجنوبية والساحل الغربي لأمريكا اللي فيه مدن زي لوس أنجيلوس و سان فرانسيسكو .. وقتها الناس استغربت بس شوية وقلنا هو احنا مستغربين ليه .. كلنا عارفين إن (كيم يونج أون) ده عيل مجنون ملوش كلمة ومينفعش أبداً إنك تعمل اتفاق رجاله مع عيل مجنون زي ده وهي دي كانت المشكلة من وجهة نظر الأمريكان .. احنا مش فاهمين دماغ (كيم).
باختصار شديد احنا منعرفش عنه غير اللي الإعلام الكوري الشمالي عايزنا نعرفه إنه شخصية نرجسية شايف إنه زعيم الأمة وكلمته سيف علي الناس كلها .. طب هو بيحب ايه .. بيكره ايه .. مفتاحه فين .. له في النسوان ولا ملوش .. لو حطيناله ايه علي الطرابيزة ممكن يزغلل عينه .. مين من رجالته ينفع نجنده لحسابنا .. كل دي أسئلة الإجابة عنها كلها هي الله أعلم .. الحل اللي الناس كلها كانت عارفاه إن بطريقة ما أو بأخري المخابرات الأمريكية تقدر تجسس علي الإتصالات بتاعة الناس اللي تعتبر الحاشية بتاعة (كيم يونج أون) .. الحل كان إنك تحط جهاز يقدر يتجسس علي الناس دي وتركبه جوه كوريا الشمالية وبغض النظر انك تكون ضامن إن الجهاز ده ميتلقطش أو ميتكشفش بس إنت محتاج الأول تلاقي إجابة علي السؤال بتاع هو انت بالصلاة علي سيدنا النبي حتوديه كوريا الشمالية ازاي اصلا .. الحل اللي وزارة الدفاع الأمريكية قالته إن اللي يتولي المهمة دي هو السرب الأحمر Red Squadron وده الاسم الكودي لوحدة SEAL Team 6 ودي نفس الوحدة القتالية اللي قدرت تغتال (أسامة بن لادن) الله يرحمه في باكستان.
الفكرة نفسها لما تفكر فيها تحس قلبك بيقع .. انت بتتكلم عن إرسال قوات عسكرية أمريكية خلف خطوط العدو جوه الأراضي الكورية الشمالية .. طب حلو أنا خدامك أنا والعربية وحنفترض إن كابتن (ستيف روجرز) لبس البدلة بتاعة كابتن أمريكا وخد معاك (باكي بارنز) اللي هو Winter Soldier بجلالة قدره وراحوا سوا يحطوا جهاز المراقبة ده عشان يخلوا المخابرات الأمريكية تتجسس علي الإتصالات بتاعة حكومة كوريا الشمالية .. هل فيه حد عنده اقتناع 100% إن مستحيل العملية تفشل؟ .. أكيد فيه احتمال .. طب لو الكوريين الشماليين قدروا يأسروا عسكري من العساكر الأمريكان هل حد عنده تصور إيه اللي ممكن يحصل .. برجع وافكرك إنك بتتعامل مع عيل مجنون تحت ايده ترسانة نووية وجيش يعتبر من أقوي جيوش العالم .. ناس كتير متعرفش إن الحدود بين كوريا الشمالية وكوريا الجنوبية اللي اترسمت بعد الحرب الكورية هي عبارة عن شريط حدودي اسمه المنطقة منزوعة السلاح De-Militarized Zone وبتتسمي اختصاراً DMZ والكوريين الشماليين راصين أغلب سلاح المدفعية بتاعهم اللي هم تقريباً 8000 مدفع تقيل علي طول الحدود دي والدانات بتاعة المدافع متوجهة للقاعدة العسكرية الأمريكية في العاصمة الكورية الجنوبية سيول اللي قاعد فيها 28 الف عسكري أمريكاني .. كان فيه جلسة مباحثات حتتعمل بين كيس الشيتوس وبين المجنون ابن المجنونة في فبراير 2019 وعشان كده العملية اتحدد ليها معاد في الشهر ده قبل ما القمة تحصل عشان لو نجحت يبقي كيس الشيتوس داخل الاجتماع وهو عارف هو قبلها بيومين الكوريين الشماليين كانوا بيقولوا لبعض ايه.
لحد اللحظة اللي انت بتقرأ فيها كلامي مفيش حد يقدر يقولك وهو متطمن هو ازاي (ترامب) خد قرار إن العملية تتنفذ .. حسبها ازاي .. مين اقنعه إن نتايجها حتبقي مغرية لدرجة تخليك تاخد المخاطرة إن العملية تتم .. هل انك تتجسس علي حكومة كوريا الشمالية تارجيت يستاهل إنك تخاطر بحرب عالمية عشانه؟ .. طب هل (ترامب) أصلاً بني ادم مؤهل إنه يتحمل مسئولية قرار زي ده؟
القرار الثاني .. أنا فيه أرواح ناس في رقبتي:
شهور والعناصر بتاعة SEAL Team 6 بتتمرن لإنهم عارفين هي المشكلة فين .. المشكلة إن خبرة الناس دي كلها كانت في عمليات سريعة بتتعمل في العراق وأفغانستان اللي هم دول لا عندهم جيوش نظامية ولا أي بطاريات دفاع جوي ولا قوات حرس حدود .. بس علي الناحية الثانية سنة 2005 وقت ما كان بيحكم أمريكا (جورج بوش الإبن) وفي الوقت اللي العالم كله كان مركز علي الحرب ضد الإرهاب المولعة في العراق وأفغانستان حصل إن عناصر من SEAL Team 6 خدوا غواصة صغيرة وعملوا عملية انزل برمائي علي ساحل كوريا الشمالية بس محدش عارف بالضبط تفاصيل المهمة دي كانت ايه بس الشاهد من الموضوع إن العملية دي اتعملت قبل كده وممكن تتعمل تاني بحيث اللي حيحصل كان الأتي:
- فيه غواصة نووية أمريكية حتقرب من ساحل كوريا الشمالية وحتستغل إن الغواصات النووية بيكون صعب اوي إنها تتلقط وبمجرد ما تقرب من المياه الإقليمية بتاعة كوريا الشمالية حيطلع منها غواصتين صغيرين كل غواصة فيها عناصر من SEAL Team 6.
- لمدة ساعتين الغواصتين الصغيرين حيفضلوا يبحروا باتجاه ساحل كوريا الشمالية لحد ما يبقوا علي مسافة قريبة بما يكفي إن وهي تحت المياه حيطلع 8 عناصر من SEAL Team 6 يعوموا زي الضفاداع البشرية اللي شفتهم في فيلم الطريق إلي إيلات عشان يطلعوا من المياه يتمشوا لمسافة تقريبا 2 كيلومتر يحطوا الجهاز بتاع التجسس ويرجعوا تاني.
لحد هنا لو انا سكت يبقي كده ده سيناريو فيلم من بتوع هوليوود اللي بيوروك إن العسكري الأمريكاني ده جامد زحليقة بس الحقيقة مش كده .. طب إيه المشكلة؟ .. المشكلة إن عملية زي دي لو هي هي بنفس تفاصيلها اتعملت مثلاً في بلد تانية زي فنزويلا أو سوريا فاللي بيحصل إن بيبقي فيه طيارة بدون طيار Drone بتصور كل حاجة لحظة بلحظة وبتبعت بث مباشر لمركز قيادة العمليات اللي بيكونوا زي ما تقول كده بيتفرجوا علي ماتش كورة Live .. مش بس كده .. مش بعيد يكون فيه طيارة تشويش وحرب أليكترونية بتتجسس علي الإتصالات العسكرية للبلد اللي العملية بتتنفذ فيها .. كل ده مش متاح لما بتتكلم عن كوريا الشمالية .. المراقبة الوحيدة اللي تحت ايدك في حالة زي دي هي الصور بتاعة الأقمار الصناعية وبتاعة طيارات التجسس اللي مش بتديك بث مباشر .. حاول تتخيل إنك بتتفرج علي ماتش كورة بس الماتش مش شغال بث مباشر إنما كل دقيقة ابعتلك صورة ثابتة من الماتش وانت بقدرة قادر محتاج تبقي متخيل احداث الماتش ماشية ازاي .. مش بس كده .. انت بمجرد ما الغواصتين الصغيرين طلعوا من الغواصة النووية الكبيرة بتتقطع الاتصالات بين عناصر SEAL Team 6 وبين القيادة بتاعتهم .. طب أزيدك من الشعر بيت .. الغواصتين الصغيرين اللي حيوصلوا العناصر بتاعة SEAL Team 6 للشط حيفضلوا غاطسين في قاع البحر وكل غواصة فيها بحار عشان يسوقها .. أساساً البحار ده ممنوع عنه الإتصال بعناصر SEAL Team 6 اللي علي الشط ودي نقطة حنحتاجها كمان شوية .. ظروف العملية نفسها بتسحب كتير من نقاط القوة اللي بتدي القوات الخاصة الأمريكية أفضلية كبيرة في أي عملية زي دي يعملوها.
بسبب حتة منع الاتصالات دي فالمخابرات الأمريكية قضت من حياتها شهور وهي بتراقب تحركات سفن ومراكب الصيد وحرس الحدود في الحتة من الشط اللي عناصر SEAL Team 6 حينزلوا فيها لحد ما اختاروا يوم وساعة معينة في نص الليل هم كانوا متخيلين إن احتمالات يبقي فيه حد صاحي راكب مركب في المياه تكون شبه معدومة .. هنا يجي دور إني أكلمك عن إيه اللي حصل غلط في العملية واللي الحقيقة باظت بسبب 3 حاجات حصلوا مع بعض لو كل واحد فيهم حصل لوحده يمكن كانت العملية نجحت بس زي ما انت عارف المصايب مش بتيجي لوحدها .. المصايب بيكونوا عامين جروب واتس يتفقوا فيه سوا يجوا مع بعض:
- الخطة كانت إن الغواصتين الصغيرين اللي حيوصلوا عناصر SEAL Team 6 يركنوا في قاع البحر بحيث الاتنين يكونوا باصين للساحل .. اللي حصل إن واحدة من الغواصتين ركنت في نفس المكان بالضبط اللي كان محطوطلها تركن فيه .. الغواصة الثانية البحار اللي بيسوق سرحت منه شوية وطلع لقدام سيكا فعشان يرجع تاني يركن في النقطة اللي كان مفروض يركن فيها اضطر يعمل U-turn بحيث اللي حصل إن غواصة كان وشها للساحل وغواصة تانية وشها كان للبحر .. عشان مكنش فيه وقت فعناصر SEAL Team 6 خرجت من الغواصتين علي أساس إن مشكلة الركنة دي تتحل بعدين .. بعد شوية حنعرف إنها كانت مشكلة كبيرة.
- الخطة كانت ان والضفادع البشرية بتعوم كل كام متر يطلعوا براسهم فوق مستوي المياه يبصوا بالمنظاير بتاعة الرؤية الليلية والحرارية عشان يتأكدوا إن الدنيا أمان ودي كانت المشكلة الثانية .. درجة حرارة المياه في الوقت بتاع العملية كان 4 مئوية وده كان معناه إن مفيش حد عاقل حيركب مركب تمشي في المياه في الوقت ده إلا لما يكون لابس جاكت تقيل ضد المياه ومشكلة النوع ده من الجاكتات إن أجهزة الرؤية الليلية اللي بتقرأ الإشاع الحراري لجسم البني أدمين مش بتلقطها .. ده كان السبب إن كان فيه قارب صيد ماشي في المياه وبيقرب علي المكان اللي راكنه فيه الغواصتين ومحدش من عناصر SEAL Team 6 اللي في المياه خد باله منه.
- عناصر SEAL Team 6 وصلوا للشط وقلعوا لبس الغطس بتاعهم ولسه حيبدأوا يتحركوا باتجاه المكان اللي مفروض إنهم حيركبوا فيه جهاز التجسس .. في الوقت ده تحت في قاع البحر فالبحار اللي كان راكن غواصته غلط تخيل إن ده وقت مناسب يصلح غلطته ويركن صح .. الباشمهندس شغل الموتور الكهرباء بتاع الغواصة واداها زقة كده خلت كل الانوار اللي فيها تنور لثواني عشان يلف بجسم الغواصة يعدلها .. اهو زقة الموتور وأنوار الغواصة هي اللي شدت انتباه الصيادين اللي في مركب الصيد اللي راحوا ناحيه الضوء اللي اختفي في ثواني زي ما قلتلك .. يمكن لو كان فيه اتصالات متاحه بين البحار اللي في الغواصة وبين عناصر SEAL Team 6 اللي علي الشط كان قالهم إن الدنيا أمان ومحدش خد باله من حاجة .. علي الناحيه الثانية علي الشط عناصر SEAL Team 6 شافوا مركب فيها ناس هم مش عارفين هم مين ماسكين كشافات كهرباء وينوروا علي الحتة اللي راكن عندها الغواصتين .. قائد العناصر بتاعة SEAL Team 6 مكنش عنده رفاهية الوقت اللي يقرر فيها يعمل ايه .. الرجل فتح نار مدفعه الألي علي القارب وطبعاً رجالته كانوا وراه بيضربوا نار عشان يقتلوا كل اللي فيه اللي بعد كده عرفنا انهم كانوا صيادين .. لبسوا لبس الغطس تاني ورجعوا للغواصتين عشان المهمة تفشل.
قرار قائد عناصر SEAL Team 6 إنه يضرب نار ده لوحده ممكن يتكتب فيه كتب .. معلومة ليك إن خطة العملية كانت بتقول إن الغواصة النووية اللي كانت راكنه بره المياه الإقليمية بتاعة كوريا الشمالية كان فيها فريق اضافي من SEAL Team 6 جاهز إنه يركب لانشات سريعة عشان يلحق الفريق اللي علي الشط لو حصل حاجة .. مش بس كده .. فيه حاملة طائرات قريبة فيها طيارة V-22 Osprey جواها فريق ثالث من SEAL Team 6 جاهز برده للتدخل في حالة إن الفريق اللي علي الشط لبس في الحيط .. كل ده كان في دماغ القائد اللي قرر يضرب نار بس هو لقي إن المخاطرة بأرواح الناس دي كلها مش القرار الصح اللي يتاخد .. هل هو صح؟ .. هل هو غلط؟ .. هل المشكلة كانت في إن أصلاً عناصر القوات الخاصة الأمريكية بيعتمدوا بشكل مبالغ فيه علي التكنولوجيا والمراقبة فلما احتاجوا إنهم يشتغلوا من غيرها لقوا نفسهم محتاسين حوسة البلجيك؟
القرار الثالث .. احنا حنعمل فيها من بنها:
القمة المنتظرة بين (ترامب) و (كيم يونج أون) تمت زي ما كان متخطط ليها ومحدش جاب سيرة حاجة والمباحثات خلصت علي مفيش .. بعدها في يونيو برده اتعمل لقاء ثاني في DMZ وقدام الصحفيين (ترامب) داس علي الحتة من الشريط الحدود اللي تحت سيطرة كوريا الشمالية قال يعني انا أول رئيس أمريكي رجله تدوس تراب كوريا الشمالية وبرده الاجتماع ده خلص علي مفيش .. يمكن بالعكس خلال الكام شهر بعد اخر لقاء بينهم كوريا الشمالية ضربت كم صواريخ عابرة للقارات قادرة علي حمل رؤوس نووية قد اللي هي ضربته في سنين.
رغم إن العملية دي حصلت في 2019 إلا إن لا الأمريكان ولا الكوريين الشماليين جابوا سيرتها وكفوا علي الخبر ماجور لحد ما اتنشر تقرير في جرنان The New York Times في سبتمبر 2025 طلع حكي القصة .. المذهل في الموضوع إن حتي أعضاء الكونجرس اللي هو مجلس الشعب في أمريكا الأعضاء في لجنة الدفاع والأمن القومي واللي المفروض وفق القانون يكونوا عارفين إن فيه عملية بالحجم ده حتتعمل في بلد مش في حالة حرب صريحة مع أمريكا لقيناهم هم كمان محدش قالهم وده يوريك حاجة مهمة أوي وهي إن الفشل يتيم بس النجاح له ألف أب .. يعني مثلاً .. حتلاقي الأمريكان فرحانين أوي بنفسهم علي العملية اللي هم نفذوها عشان يأسروا الرئيس الفنزويلي (نيكولاس مادورو) لدرجة إن في المؤتمر الصحفي لشرح اللي حصل اتساب قائد إدارة العمليات الخاصة في القوات المسلحة قدام الصحفيين يدي محاضرة ولا كأنه في بودكاست علي أزاي القوات المسلحة الأمريكية عارفه القرد مخبي ابنه فين .. بس عملية تانية فشلت زي بتاعة كوريا الشمالية مش حتلاقي حد بيجيب سيرتها وده مع الوقت بيديلك انت كمواطن بسيط انطباع إن العمليات الخاصة دي حاجة سهلة وبتتعمل عادي لإن اللي بيوصلك هي العمليات اللي نجحت بس .. ده عامل زي ما انت تبقي شايف إن السواقة سهلة وبسيطة لإنك بتشوف الناس في الشارع بتسوق في أمان الله بس لو انا كل شوية ومع كل حادثة عربية اطلع اقرف عيشتك في السوشيال ميديا علي تفاصيل كل حادثة بتحصل في شوارع مصر كلها فحاجة جواك حتخليك تفتنع إن السواقة مهياش سهلة زي ما انا كنت متخيل.
حتة الفشل المتكرر دي للناس بتاعة العمليات الخاصة خلي بالك منها كويس لإن للأسف الصورة اللي بتتصدرلك عن الناس دي إنها بيطلعوا نار من بقهم وده مش حقيقي .. خد مثلاً عندك الناس بتاعة SEAL Team 6 .. انت اللي رايح واللي جاي يقولك دي الناس اللي قتلت (بن لادن) بس ده زي ما كده اخوك اللي عامل حوادث بعدد شعر راسه تيجي تقوله انت مبتعرفش تسوق يقولك انا من سنة وديت ماما المطار ورجعت من غير ما حاجة تحصل .. معاك إن عملية اغتيال (بن لادن) كانت معقدة بس متنساش إن أول عملية SEAL Team 6 يعملوها كانت سنة 1983 خلال العملية العسكرية لغزو جزيرة جرانادا اللي هي جزيرة صغيرة في أمريكا الوسطي .. الخطة كانت الناس دي حتنزل بالباراشوت في عرض البحر وهم عايمين يفردوا لانشات سريعة يركبوها عشان يروحوا للساحل عشان يوجههوا الغارات الجوية اللي حتضرب المطار الوحيد اللي موجود في الجزيرة .. عايز اقولك إن العملية فشلت فشل ذريع .. اختيار اليوم كان غلط لإنه صادف إن حصلت فيه عاصفة في البحر وفيه 4 عناصر من SEAL Team 6 غرقوا مع اللانشات اللي كانوا مفروض يركبوها .. المشكلة مش في كده .. المشكلة إن بعديها بكام يوم نفس المطار اللي كان المفروض إنه حيتضرب بالطيران تم احتلاله بالكامل عن طريق عناصر الجوالة Rangers اللي هم قوات نظامية عادية جداً بتاعة مظلات نزلت بالباراشوتات برده في قلب المطار وسيطرت عليه .. مسلسل العمليات الفاشلة لفرقة Seal Team 6 استمر من باناما لافغانستان لليمن للصومال .. سنة 2010 نفذوا عملية فاشلة لانقاذ رهينة في أفغانستان وسبب فشل العملية إنهم هم اللي قتلوا الرهينة بالغلط .. وبرده مش دي القضية أي حد ممكن يغلط .. المشكلة إنهم كذبوا في التقارير الرسمية عن سبب موت الرهينة عشان ميبانوش إنهم شوية بهايم مش فاهمين هم بيعملوا ايه.
عشان بس تفهم معايا حجم المصايب اللي الناس دي كانت بتعملها .. تعالي نتخيل سوا إن أنا (باراك أوباما) .. وتعالي نتخيل إن أنا اللي اتصورت ماشي بتمخطر في طرقة البيت الأبيض عشان أعلن للشارع الأمريكي مقتل (بن لادن) اللي الأمريكان كانوا شايفينه زي ما احنا شايفين (بنيامين نتنياهو) كده وإن اللي خلص عليه كانوا عناصر SEAL Team 6 .. من وجهة نظر سياسية وإعلامية بحتة أنا من مصلحتي إن في الرايحه والجايه اتصور معاهم .. يارجل ده لو انا عايز اروح اشتري موبايل هديه لمراتي حاخد معايا عناصر SEAL Team 6 يتصوروا معايا عشان اوري الشارع الأمريكي ازاي الناس دي مجاش زيها .. إذا يا اخويا اللي يحصل إن (اوباما) يطلع قرار إن من هنا ورايح مفيش طيارة تطلع لمهمة للناس دي من غير موافقته الشخصية .. كم القيود اللي اتحطت علي شغلهم كانت غير طبيعية والسبب هو المصايب اللي هم بيعملوها .. بيمشي (أوباما) وبيجي (ترامب) اللي من أول الخطوات اللي عملها إنه شال القيود اللي اتحطط علي عمليات SEAL Team 6 وتفتكر ازاي الناس ترد له الجميل؟ .. تخيل كده .. أول عملية يعملوها وهو في البيت الأبيض كانت كارثة بكل المقاييس في اليمن ادت لاستشهاد 30 مزارع يمني ملهمش ذنب وتدمير طيارة هليكوبتر ثمنها معدي 75 مليون دولار .. يمكن انا ممكن أفهم صمت الأمريكان والكوريين الشماليين إن محدش فيهم جاب سيرة عن اللي حصل بس كل طرف عمل نفسه من بنها لأسباب مختلفة .. أنا ممكن أفهم إن الكوريين الشماليين لحد نشر التقرير بتاع The New York Times مكانوش متؤكدين بنسبة 100% مين المسئول عن مقتل الصيادين بتوعهم بس اللي أنا برده فاهمه كويس إن الأمريكان سكتوا عشان ميبقاش اللي حصل وصمة عار جديدة تتضاف للسجل اللي زي الزفت للناس اللي بيتقالنا عليهم إنهم صفوة الصفوة بتوع العمليات الخاصة في العالم.
المصادر:
- مقالة بعنوان How a Top Secret SEAL Team 6 Mission Into North Korea Fell Apart نشرت في جرنان The New York Times الأمريكاني وده لينك المقالة الأصلية:
How a Top Secret SEAL Team 6 Mission Into North Korea Fell Apart – The New York Times
