لينك التسجيل الصوتي للمقالة علي Sound Cloud:
https://soundcloud.com/user-112011687-312727988/46a?si=52b12bae6de14cb0a9cc64138f2a97e1
حرب أكتوبر دي لو حتشبهها بحاجة فهي عامله بالضبط زي فيلم The Matrix .. الفيلم ده إتعرض سنة 2000 ففيه منكوا كتير كان لسه صغير إنه يستوعب حجم الإنبهار اللي كلنا كنا فيه بعد ما شفناه .. إحنا بقينا نلبس نظارات شمس سودا عشان نبقي شبه شخصية (نيو Neo) .. إحنا كنا متخيلين إننا شفنا كل حاجة في السينما لحد ما (كيانو رييفز Keanu Reeves) بقي بيتفادي الطلقات بالSlow Motion .. الفيلم ده بمنتهي البساطة صحانا علي حقيقة إننا كناس بتحب السينما بلاش نتخيل إننا أوتينا من العلم ما لم يأت أحد من قبلنا .. دايماً حيبقي فيه جديد و دايماً حيبقي فيه إبهار .. حرب أكتوبر عملت كده للناس اللي شغلها إنها تحلل و تقيم الحروب .. بعد الحرب العالمية الثانية الناس كلها تخيلت إن خلاص كده إحنا شفنا كل حاجة .. شفنا غارة جوية بتقوم بيها 200 طيارة علي ميناء عشان تدمر أسطول كامل زي ما حصل في غارة بيرل هاربور .. شفنا حرب مدن من أشرس ما يكون في ستالينجراد .. شفنا معارك دبابات في الصحراء مكنتش تخطر علي خيال حد إنها تحصل زي ما حصل في العلمين.
بس جت حرب أكتوبر خدتنا كف علي وشنا عشان تقولنا أصحوا .. طول ما فيه حروب و طول ما فيه علم و طول ما فيه ناس بتفكر ياما حنشوف إبتكارات و مفاجأت .. محدش كان متخيل إن حتحصل معارك دبابات تاني زي اللي حصلت في الحرب العالمية الثانية بس سيناء شافت أضخم معركة دبابات في التاريخ لحد وقت الحرب .. محدش كان متخيل إن حيجي اليوم و نلاقي عسكري ماسك Joystick زي بتاعة الأتاري و PlayStation و بيتحكم في صاروخ بكابل عشان يطيره لحد ما يدمر به دبابة .. محدش كان متخيل إن منظومة صواريخ دفاع جوي ممكن تبقي زي الناموسية اللي تحمي قواتك من خطر طيارات العدو .. حاجات كتير أوي شفناها لأول مرة في حرب أكتوبر .. فعلياً الحرب مستمرتش كتير .. هم تسعين يوم و كانت خلصت بس الحقيقة إن فيه دروس كتير أوي إستفدناها منها:
دي كانت أول مرة نشوف إن فكرة القذايف الموجهة بتنفع:
واحد من أهم الأسلحة اللي كانت في إيد القوات المصرية في الحرب هو صاروخ يبان أهبل و ممكن تتخيله لعبة أطفال إسمه ساجر Sagger .. الصاروخ ده عبارة عن صاروخ نونو كده بمنصة إطلاق صغيرة بيتحط علي الأرض و فيه عسكري بيبقي معاه Joystick عشان يتحكم في الصاروخ و هو ماشي في الجو بحيث إن الإشارة من Joystick بتوصل للصاروخ عن طريق كابل نحاس زي الكابل بتاع مشترك الكهرباء كده .. السلاح ده كان فعال أوي ضد الدبابات الإسرائيلية .. فكر فيها كده .. إنت بتبقي شايل مدفع RBG عشان تضرب صاروخ علي دبابة فإنت بتنشن و بتضرب و يا صابت يا خابت .. مع Sagger إنت بتتحكم في مسار الصاروخ عشان تضمن إنه يضرب الدبابة .. بمعني أخر إنت بقي عندك صاروخ موجه أو ما يسمي Guided Missile .. إذا كان دلوقتي التوجيه ده بيتم عن طريق GPS و الليزر و الأقمار الصناعية فأيام الحرب دي التوجيه كان بيتم يدوي بس دي كانت مجرد البداية لتطبيق فكرة غيرت مفهوم الحروب في الوقت اللي إحنا عايشين فيه ده.
بلاش تتخيل إن سلاح معين خلاص راحت عليه و مبقاش له عوزه:
أكتر سلاح يا عيني يعتبر ملطشة أي حد بيتكلم في الأسلحة هو الدبابات .. لما طلعت الدبابات لأول مرة في الحرب العالمية الأولي ناس كتير قالت إيه العك و القرف ده؟ .. حستفيد إيه أنا من علبة حديد ماشية علي عجل يعني؟ .. في الحرب العالمية الثانية الدبابات أثبتت إنها سلاح مش بس مهم دي سلاح جاحد خصوصاً في حسم المعارك في ميادين مفتوحة زي الصحراء و ده اللي حصل في معارك شمال أفريقيا بين الألمان و الإنجليز .. لما الحرب العالمية الثانية خلصت ناس كتير تخيلت إن كده خلاص الدبابات معدش ليها لازمة لإن فعلياً مش حتحصل معارك في أماكن مفتوحة تاني بين جيشين عندهم أسطول دبابات .. حرب أكتوبر و خصوصاً معركة الدبابات اللي حصلت تاني و تالت يوم الحرب كانت عامله زي ما الناس إنبهرت بمشاهد الكونج فو في فيلم The Matrix كده .. كلنا إتفرجنا علي الكونج فو في أفلام (جاكي تشان) و (بروس لي) و (جان-كلود فان دام) بس مكناش متخيلين إن الموضوع حيبقي سيكسي أوي كده لما نشوف (كيانو رييفز) بشعره بيتنطط يمين و شمال.
بس فيه نقطة .. حرب أكتوبر أثبتت إن الدبابات فيها نقطة ضعف رهيبة و هي إنك بسهولة أوي ممكن تدمر حاجة متكلفة فوق 30 مليون دولار و فيها أربع بني أدمين بصاروخ ميجيش ثمنه 1000 دولار .. الRocket Propelled Grenades أو القنابل اللي بيتم إطلاقها بمنظومة صاروخية و دي اللي كلنا عارفينها بإسم RPG و بنسميها صواريخ محمولة علي الكتف أثبتت إنها نقطة ضعف الدبابات .. الدرس اللي اللي الناس إتعلمته من حرب أكتوبر إن الدبابات مينفعش تشتغل لوحدها .. لازم الدبابة تتعامل معاها زي ما بتتعامل مع حاملة الطائرات بالضبط.
حاملة الطائرات مش بتشتغل لوحدها .. دي بتبقي ضمن حاجة إسمها مجموعة قتال Strike Group معاها مدمرات و فرقاطات و غواصات و ليلة كبيرة أوي سعادتك .. الدبابة كده برده .. لازم عشان تشتغل صح تبقي متغطية بمدافع ميدان و يبقي معاها عساكر مشاة .. الدرس ده الروس إتعلموه بنفسهم لما إتعوروا جامد من عملية اقتحام العاصمة الشيشانية جروزني سنة 1999 .. الجديد إن الإسرائيليين نفسهم طوروا منظومة جديدة لحماية الدبابات إسمها Active Protection System أو APS و النظام ده متركب علي دبابات الميركافا الإسرائيلية و الT-14 Armata الروسية.
صحيح فيه دفاع جوي بس الطيارات كمان تقدر تتفاداها:
لما إنت شخصياً تسمع سيرة S-400 أو S-300 إيه أول حاجه بتجي في دماغك؟ .. بتقول لنفسك باااااس أنا قريت في الجرايد أو في خبر علي Social Media إن مصر عندها منظومة الدفاع الجوي الروسية S-300 فكده خلاص يا جدعان إسرائيل أو أميركا متقدرش تهوب ناحيتنا بطياراتها و أبقوا خلوا الطيارات الF-35 Lightening II تنفعكوا .. الرأي ده إتزرع في دماغنا لما القوات الجوية الإسرائيلية إتعرضت لخساير رهيبة بسبب منظومة الدفاع الجوي من صواريخ SAM الروسية بتاعتنا بس دلوقتي الوضع إختلف .. طيارات مقاتلة حديثة زي F-15E Strike Eagle أو F-35A أو F-22 Raptor متصممين بحيث يتركب عليهم أنظمة تشويش علي الرادارات عشان متتلقطش و لو إتلقطت فالطيارة فيها حاجة إسمها Flares و دي عبارة عن حاجة بتولع و بتطلع درجة حرارة عالية أوي عشان لما صاروخ مضاد للطيارات يجري ورا الطيارة فالطيار بيرمي الFlares دي عشان الصاروخ يجري وراها بدل ما يجري ورا الطيارة .. حرب أكتوبر مخلتش الناس تقول إن خلاص راحت علي الطيارات .. هي علمت مهندسين الطيران إنهم محتاجين يشتغلوا كتير علي تصميماتهم عشان يتعاملوا مع تهديد جديد للطيارات مكنش حد عامل حسابه عليه.
أوعي تتعرض لهزيمة فتقول كده خلاص انا خسرت .. دايماً إنت تقدر تقلب الطرابيزة علي الكل:
الريمونتادا مش بس في كرة القدم .. زي ما ليفربول كان مغلوب 3-0 في الشوط الأول في نهائي Champions League سنة 2005 قصاد ميلان و قدر يقلب الطرابيزة و يكسب البطولة أو زي ما بنسميها معجزة أسطنبول فكمان أي جيش في الدنيا يقدر يكسب أي حرب بشوية تفتيح مخ .. حاول تبص علي حرب أكتوبر زي ماتش ليفربول و ميلان كده .. ميلان وقتها كان فرقة جامدة زحليقة .. فرقة فيها (أندريا بيرلو Andrea Pirlo) و (كاكا Kaka) و (كلارينس سيدورف Clarence Seedorf) و (جينارو جاتوزو Genaro Gattuso) و (باولو مالديني Paulo Maldini) و (أليساندرو نيستا Alesandro Nesta) و كمان (هيرنان كريسبو Hernan Crespo) .. فرقة عتاولة بحق و حقيقي .. مين يقدر يكسب فرقة زي دي؟ .. الإسرائيليين قالوا علي نفسهم كده برده .. إحنا عندنا خط بارليف بيحمينا من المصريين .. واقفين فوق هضبة الجولان يعني السوريين محتاجين معجزة إلهية عشان يعرفوا ياخدوها مننا .. معانا أحسن سلاح في العالم .. مين يقدر علينا؟ .. كل اللي المصريين كانوا محتاجينه هو شوية تفتيح مخ .. بس وقت الحرب الوضع إتعكس.
فجأة بقينا إحنا ميلان .. فكك من إننا عرفنا نعبر ده كان الجون الأول .. ناس كتير متخيله إن دي كانت معجزة الحرب إننا عبرنا .. في الحقيقة لا .. العبور ده كان الجزء السهل .. صد الهجوم المضاد أو Counter Attack اللي عملته إسرائيل في سيناء ثاني و ثالث يوم كان فعلاً هو المعجزة لإن ده خلانا إتنين صفر .. مع نهاية اليوم الثالث الإسرائيليين كانوا فعلاً قدام سيناريو إن خلاص كده دي حرب النهاية و إن سيناء راحت و السوريين حيبدأوا يشنوا هجومهم علي حيفا و ساعتها إسرائيل مش حيبقي عندها حل غير إنها تستخدم القنبلة النووية أو إن اسرائيل تقبل بوقف إطلاق نار بشروط مهينة أوي .. مع بداية اليوم الرابع للحرب إحنا كنا كسبانين 3-0 و بنقول لنفسنا خلاص إحنا حسمنا الحرب.
خلال أسبوعين بس كان الإسرائيليين عملوا الريمونتادا .. مش بس قدروا يوقفوا السوريين دول رجعوهم لورا لحد ما بقت المدافع و الدبابات الإسرائيلية تقدر تقصف العاصمة دمشق .. علي الجبهة المصرية كان (أرييل شارون Ariel Sharon) إستغل الثغرة اللي إتفتحت بين الجيشين الثاني و الثالث و قدر يوصل لقناة السويس .. بعد ما كان الكلام علي إن إسرائيل هي اللي حتبقي مٌجبرة إنها تقبل بإتفاق وقف إطلاق نار مٌهين الوضع إنعكس و بقينا إحنا اللي بنترجاها توافق الضرب يقف و الإسرائيليين وافقوا بعد ما السوفييت هددوا بإنهم حيتدخلوا عسكرياً .. صحيح سياسياً إسرائيل خدت علي قفاها .. هي قدام الناس برستيجها إتهز جامد بس كان يمكن الوضع حيبقي زي الزفت علي دماغهم لو كانت إسرائيل خسرت الحرب عسكرياً علي الأرض.
في الحروب مش لازم تمسح بكرامة عدوك الأرض عشان تقول علي نفسك إنتصرت:
اللي حصل في الحرب العالمية الثانية صعب أوي يتكرر تاني .. بص علي اللي حصل للأمريكان مثلاً .. الأمريكان إتضربوا جامد في بيرل هاربور .. بعد كده خدوا فوق دماغهم في جوام .. شوية و خسروا الفلبين .. لدرجة إن ناس كتير جوه أميركا كانت متخيلة إن خلاص كده في أي لحظة الأسطول الياباني حينزل علي سواحل أميركا و يبدأ غزوه البري .. بس فجأة الأية إتقلبت بعد معركة ميداوي .. جري الشريط لحد سنة 1945 و تلاقي القوات الأميريكية دخلت اليابان و أجبرت الإمبراطور (هيروهيتو) إنه يمضي علي إتفاق الإستسلام .. ده إسمه نصر حاسم لحرب .. انت خلاص مسحت بكرامة عدوك الأرض و دخلت بيته .. حرب أكتوبر مش كده .. حرب أكتوبر فيه ناس رأيها إن حقها يتقال عليها تعادل .. في حرب أكتوبر إسرائيل معرفتش تحقق اللي هي حققته في النكسة ولا إحنا قدرنا نستغل النجاحات الجاحدة اللي وصلنا ليها في أول 4 أيام من المعارك .. عسكرياً انا أبقي بكدب علي نفسي لو قلتلك إننا كسبنا الحرب ولا حتي الإسرائيليين كسبوها .. عسكرياً الحرب دي خلصت بتعادل .. سياسياً هو ده اللي تقدر تقول عليه نصر لينا لإن إحنا رجعنا الأرض اللي راحت مننا في النكسة.
الممصدر:
مقالة بعنوان What Military Planners Can Learn from the 1973 Arab-Israeli War .. نشرت في مجلة The National Interest و ده لينك المقالة الأصلية:
//nationalinterest.org/blog/buzz/what-military-planners-can-learn-1973-arab-israeli-war-33787
