اكتر مجال فيه فتي و هبد كتير .. هنا حنحاول نفهم الحقيقه و الصوره الكامله لاي صراع سياسي او خناقه سياسيه بتحصل في الدنيا
غم إن العملية دي حصلت في 2019 إلا إن لا الأمريكان ولا الكوريين الشماليين جابوا سيرتها وكفوا علي الخبر ماجور لحد ما اتنشر تقرير في جرنان The New York Times في سبتمبر 2025 طلع حكي القصة .. المذهل في الموضوع إن حتي أعضاء الكونجرس اللي هو مجلس الشعب في أمريكا الأعضاء في لجنة الدفاع والأمن القومي واللي المفروض وفق القانون يكونوا عارفين إن فيه عملية بالحجم ده حتتعمل في بلد مش في حالة حرب صريحة مع أمريكا لقيناهم هم كمان محدش قالهم.
في أول اسبوع من ابريل 2025 حصل اجتماع مدته نص ساعة بين (ترامب) و واحدة اسمها (لورا لومر) ودي تبقي ست تقيلة أوي في التيار اليميني المحافظ في أمريكا ومعروف عنها إنها ضمن اللوبي بتاع الإمارات في واشنطن يعني هي بتاخد فلوس من الإمارات في مقابل إنها زي ما تقول تخلصلهم ورقهم في واشنطن .. المهم إن بعد القعدة دي الناس صحيت علي خبر إن (ترامب) رفد 6 أعضاء من مجلس الأمن القومي بتاعه
القانون رقم خمسين Title 50 ده قانون متفصل علي مقاس CIA عشان يخلي المخابرات الأميريكية تعمل اللي هي عايزاه من غير ما حد يقدر يمسك عليها حاجة .. تبقي المصيبة معمولة وعملها ناس شغالين في CIA وواخدين أوامرهم من الرئيس شخصياً ولما المصيبة تتعرف وتبقي فضيحة بجلاجل ويجي صحفي يسأل الرئيس الأميريكيي في وشه هو إنت اللي أمرت CIA تعمل المصيبة دي فيجي الرئيس بكل ثقة يبص بعنيه للكاميرا ويقول أنا معرفش حاجة عن الكلام ده.
يا جدعان مشكلة (ترامب) مش الصين .. مشكلة (ترامب) إنه مش عايز يدفع .. عشان كده يوم 5 فبراير ومن غير لا احم ولا دستور موقع وزارة الخارجية الأميريكية طلع من نفسه قال إن من هنا ورايح أميركا مش حتدفع فلوس علي حركة الأسطول الأميريكي في القناة اللي هم أًصلاً ملاليم يعني .. بناء علي كلام هيئة قناة باناما فانت بتتكلم عن 25.4 مليون دولار خلال 26 سنة يعني أقل من مليون في السنة .. منطق (ترامب) إن منين إنت بتقولي إن اتفاقية كارتر توريخوس بتدي أمريكا حق التدخل العسكري لضمان استمرار الملاحة وفي نفس الوقت بتدفعني فلوس علي حركة أسطولي في القناة.
أرجع وأقولك أنا متفهم جداً إن ممكن ريق (محمد بن سلمان) يكون بيجري علي إن الصفقة دي تتم لإن صدقني نتايج الصفقة دي حتبقي أهم بكتير من نتايج معاهدة كامب ديفيد .. عارف إنك متضايق بس دي الحقيقة .. مصر مبقتش زي زمان .. دلوقتي مفتاح الشرق الأوسط كله بقي في إيد الرياض.
بس يمكن نتايج قرار روسيا إنت ممكن متشوفهاش دلوقتي بس حتحس بيها قدام .. خلينا متفقين إن عشان روسيا تزود من عدد الرؤوس النووية اللي تحت إيدها فده مش حيفيدها في حاجة لإن لو عندك 1,500 رأس نووي مش حتفرق معاك لو بقوا 1,501 خصوصاً إن ده حيسحب وقت و فلوس و يا حسرة روسيا لا عندها الوقت ولا الفلوس لإن الحرب في أوكرانيا حنفية مصاريف مكسورة و مغرقة الدنيا.
السر اللي الناس كلها عارفاه إن المملكة حاطة 3 شروط عشان تطبع علاقاتها مع إسرائيل .. عايزين اللوبي اليهودي في أميركا يضغط علي الكونجرس عشان يتمضي إتفاق تعاون أمني طويل الأمد مع المملكة اللي هو حاجة شبه كده العلاقة المريبة بين إسرائيل و أميركا .. عايزين مساعدة الأمريكان إنهم يعملوا مشروع نووي سلمي .. عايزين يبقي من حق السعودية تاخد أحدث الأسلحة اللي بتنتجها أميركا و هي دي المشكلة.
و ده بيحطك قصاد أهم حقيقة في الخناقة دي .. دي خناقة متوصفهاش غير الأية الكريمة اللهم أضرب الظالمين بالظالمين و أخرجنا منها سالمين .. دي خناقة بين إتنين قتالين قتلة كل واحد فيهم حيموت و يقعد علي الكرسي .. دي مش خناقة بين عقائد أو أيدولوجيات أو أفكار سياسية و عشان كده دي خناقة جديدة علي السودانيين نفسهم.
ممكن يكون في الأول المبرر ورا إنشاء فاجنر جروب كان إن الكريملين عموماً و (بوتين) خصوصاً يبقي عنده القدرة إنه ينكر بس دلوقتي الموضوع إختلف شوية .. الناس دي إتبعتت لسوريا و إتبعتت لدول أفريقيا عشان يقوموا بدور مش دورهم .. المفروض إن التاسكات اللي عناصر فاجنر جروب بيقوموا بيها خصوصاً في أفريقيا من إختصاص وزارة الخارجية و المخابرات العامة.
يمكن فيه وجهة نظر تانية لكل اللي أنا قلته ده و هي إن الناس من جواها مش عايزة حرية قد ما هي عايزة إستقرار .. في إسرائيل خلال الأربع سنين اللي فاتوا البلد إتعمل فيها 5 إنتخابات برلمانية عشان كل إنتخابات بتتعمل مفيش حزب بيعرف ياخد أغلبية تخليه يشكل حكومة و هو مستريح .. منطقي و مفهوم إن الناس تكون تعبت و زهقت و قالت لنفسها تشدد تشدد مش حتفرق بس نخلص .. الحكومة الإسرائيلية الجديدة دي حتكون أول حكومة تتشكل بأغلبية برلمانية في إسرائيل من سنة 2019.
من وجهة نظر الأوكرانيين فهم من اليوم الأول للغزو ولو جيت سألتهم إيه اللي لو حصل حتقولوا إن إحنا مبسوطين حيقولولك إن مش بس نصد الهجوم الروسي .. و مش بس نجبر روسيا علي الإنسحاب .. إنما كمان نرجع شبه جزيرة القرم و إقليم الدونباس اللي الروس خدوهم مننا غصب سنة 2014 .. فدلوقتي لما تيجي تقولهم إن مش بس إنتوا مش عارفين ترجعوا القرم و الدونباس ده كمان فيه حتت تانية من شرق أوكرانيا ضاعت عليكوا يبقي أكيد الناس دي خسرت الحرب.
الروس مينفعش يخشوا كييف يحطوا حكومة موالية ليهم ويمشوا لإن بمجرد ما يمشوا الحكومة دي الناس حتثور عليها .. إفتكر إن أوكرانيا عايش فيها 44 مليون بني أدم بقالهم 30 سنة بيحلموا باليوم اللي ينضموا فيه للإتحاد الأوروبي .. طب والحل؟ .. لازم روسيا تحتفظ بقوة عسكرية محترمة ممكن توصل 50,000 مقاتل بتسليحهم وأكلهم وشربهم ومتتخيلش إن (بوتين) مش حيقدر يقدم التضحيات دي لإن ده رجل مقتنع بفكرة إسمها العالم الروسي أو Russky-Mir.
مهم برده بالنسبة لي إنك تبقي فاهم المنطق بتاع (جون كيري) و (باراك أوباما) و أي مسئول أميريكي يقولك إحنا محتاجين الحرامية أكتر ما هم محتاجين لينا و المنطق ده هو الأتي إنك عشان تنقل بضاعة من كابول لقندهار مش زي إنك تروح بعربيتك من أكتوبر للتجمع .. الطرق في أفغانستان بيسيطر عليها أمراء حرب و بلطجية و زعماء قبائل و الناس دي عشان تعدي من أرضهم سالم أمن غانم لازم تدفع.
(بوتين) دلوقتي عنده مشكلة الناس هناك بتسميها مشكلة الأربعة و عشرين Problem 24 وهي بمنتهي البساطة إنك بتتكلم عن رجل عنده 72 سنة و داخل إنتخابات في 2024 لو كسبها حيبقي رئيس لفترة رئاسية جديدة مدتها 6 سنين يعني تقريباً (بوتين) عايز يبقي رئيس لحد ما يموت .. عشان ده يحصل (بوتين) مينفعش يبقي رئيس السلم .. هو لازم يبقي رئيس الحرب.
ثانياً نقطة إن محدش حيسمي علي أوكرانيا .. الروس عندهم يقين إن ساعة الجد محدش حيقف ورا أوكرانيا .. فكك من الشعارات اللي بتترفع من الإتحاد الأوروبي وأميركا .. أوكرانيا مش عضوة في حلف شمال الأطلنطي NATO وبالتالي مفيش أي مبرر يخليهم يتدخلوا في حالة إن الروس غزوا أوكرانيا .. وبعدين لو الأمريكان كانوا عاملين إعتبار لمصير أوكرانيا كانوا عملوا حاجة بعد إحتلال روسيا لشبه جزيرة القرم سنة 2014.